TË NDALET URGJENTISHT!/ PD dhe LSI pjesë e KZAZ-së, reagon me tone të ashpra Patozi: Përpjekje për të penguar procesin

TË NDALET URGJENTISHT!/ PD dhe LSI pjesë e KZAZ-së, reagon me tone të ashpra Patozi: Përpjekje për të penguar procesin

May 16, 2019 0 By VloraLajme

Pas lajmit se PD dhe LSI kanë çuar anëtarët e tyre në Komisionet Zonale të Administrimit Zgjedhor, ka reaguar ashpër kreu i Bindjes Demokratike, Astrit Patozi.

Patozi i bën thirrje KQZ-së ta ndalë këtë “sulm mbi procesin zgjedhor”, që sipas tij ka për qëllim goditjen e Bindjes Demokratike e cila duhet të ketë komisionerët e vetë në proces.

Patozi thotë se PD dhe LSI nuk kanë të drejtë të jenë pjesë e KZAZ pasi nuk janë regjistruar në zgjedhje dhe nuk janë pjesë e parlamentit.

Deklarata e Patozit: KQZ TË NDALË URGJENTISHT KËTË SULM MBI PROCESIN ZGJEDHOR TË 30 QERSHORIT

Lajmi se Partia Demokratike dhe LSI-ja do të kërkojnë të përfaqësohen me komisionerë, por me jo me popull, në zgjedhjet e 30 Qershorit është provokimi më i fundit ndaj procesit zgjedhor.

Zgjedhjet janë procesi i atyre, që marrin pjesë dhe administrohen sipas ligjit nga partitë e përfaqësuara në parlament. Partia Demokratike dhe LSI-ja nuk janë më të përfaqësuara, as në parlament dhe, as nuk marrin pjesë në zgjedhje me vullnetin e tyre.

Përpjekja për të penguar procesin zgjedhor me komisionerë drejtohet pikë së pari kundër BINDJES DEMOKRATIKE, e cila duhet të ketë patjetër komisionerët e vet në atë proces.

Së dyti, ajo drejtohet kundër procesit zgjedhor në tërësi, tek i cili me sa duket ata duan të fusin brenda Kalin e Trojës.

Shumica në pushtet dhe ish-opozita parlamentare mund të bëjnë pazare për pronat e shqiptarëve, për ndarje pushteti apo për çfarëdo gjëje tjetër, siç kanë bërë shpesh në të shkuarën, dhe shembulli më i qartë ishte marrëveshja e dy viteve të shkuara. Ndoshta, jo rastësisht, nesër është përvjetori i 17 majit, ditë që mesa duket e ngroh shumë marrëdhënien Rama-Basha. Por ata duhet ta dinë se nuk mund të bëjnë kurrë pazar për të administruar edhe votën e shqiptarëve për hallin e përbashkët të ruajtjes së këtij sistemi të kalbur politik.

BINDJA DEMOKRATIKE dënon me ashpërsi këtë provokim mbi procesin zgjedhor dhe i kërkon KQZ-së që të veprojë shpejt dhe me drejtësi për t’ua lënë zgjedhjet atyre që zgjedhin dhe zgjidhen dhe jo atyre që nuk duan të bëhen zgjedhje fare në Shqipëri. Korrieri